LHAOVO JHAM: PHAUG' NHAUNG LHANG MHOMYI: PAUG'
Dao: Phung"
Jham: Phaug' Mhomyi: Tung" Yaug: Akhyo
Bobo: Ra" Khyo Ajhaung Jham
Lhaovo byumyu" qe yao: yao" tung" ce' re o kao bau: li" ko" ra" akhyo
CIM Sosona mho" pho" John Khune (AYI D M) re lhao tung" ce' kad' byid: nae" bao" thaug' mho' ra" akhyo
Mr. Mrs. Ovaly Carlson tao Lhao khaung: khyo joe" li" ko" ra" akhyo
Lhaovo qe we' Lisu: qe: agyo: mae gye boe" thug' li" ra" akhyo
Lhao tung" ce' kad' thug' nae" mau" dam: qhid: ra" akhyo we' lhao tung" ce' qo" yu: ra" akhyo
Lhao Jham: Paug' phaug' qhid: lo: akhyo
Lhao Jham: Phaug' komiti: khyo" KBC Jhaung Qham khyo Jham: phaug' nae" akhang" mho' ru we' bao" thaug' yu nae" mugsug' tung" zaui: ra" akhyo
Mho" pho" (O.C) Carlson we' xo' taui" ra" akhyo
Carlson tao we' kad' ra" Jham: phaug' mau" thang: pye' ra" akhyo
Myan mang: Jham: mugsug' phung: khyo" (UBS) khyo Lhao Jham: phaug' project mho' ra" akhyo
Dao: Phung"
Akhyo daja: we' tin: yang: boe" lai: lo: ra" khyo re adai: ato' tung" xam" to" ru re mhomyi: ga: ta" ako". Ai: mhomyi: mae gai: ra" khyo bo: ru we' dakhyo: magai: ra" khyo jham re: bobo: ako". Lhao Jham: Phaug' Komiti: re: Jham: Paug' bin: kad' to: va" rumung: thao phyao: na: li" nae" ra" Lhao nau" qe alhab' Lhao Jham: Paug' pe" ru: kad' thug' to" ra" khyo re ba ca" ra" mathao mae Lhao Jham: Phaug' Nhaung Lhang mhomyi: re tung" to: nae" qhid' mae" komiti: qham: phyid' yang: tung" to" ru ngad:. Jham: Phaug' mhomyi: agyang" (Authentic) boe" nae" qhid' mae" boe" lai: lo: ra" khyo alhab' re gai: ru- magai: ru makhyin: khyo" lo: tung" to" ru ngad:. Mhomyi: tung" yaug yao: ba: ra" akhyo- ba mo, ta" kyo" ra" akhyo jham re botung" ke' to" ra". Lhaovo qe tung" ce' kao bau myid bo: li" ru mae" tung" ce' kad' ra" mhomyi:- tung" ce' qo" yu thao Lhao Jham: Paug' re khoru: kad' lo: ra" khyo jham alhab' rere: tung" to" ru ngad:. Ce: Lhao Jham: Paug' mhomyi: wa alhab' jab byang" va" khyo" wa mangad:- jab byang" sho' gyai qam: ke' qho: zhang yang: tung" to" ru ngad: ein: ru re yhin" yu: ra". Ce: Jham: Phaug' Nhaung lhang mhomyi: re ceim" nghe' yang: Mao"So: jeju re caung:khin" gelang: wo".
Jham: Paug' Mhomyi: Tung" Yaug
Lhao Jham: Phaug' mhomyi: re tung" yaug wa Rev. Lalhaug' Gyung" Khao ngad:.1985 zin mae" Ein Jang Dung - Na Yang phung: ug' khug' mae ana" ba joe" sho' Yao zam: mo" kad' na yaug ngad:. (1989) June lho" khye' mae" KBC Lhao Jham: Phaug' mau" re (2009) zin joe" sho' Lhao Jham: Phaug' mau" re Jham: Phaug' au: she yaug (chief transalator) khyo" mau" vin: lo yaug ngad:. (1963) zin Rev. Samuye Pha lo, mae qid nyhab' kham: yu mung: Rev. Samuye Pha nho: phung: zo: dayaug re: ngad:. Rev. Samuye Pha yang Lhao tung" ce' we' tin" ra" boe" lai: lo: ra" akhyo re ta" khyo: mung: ai jham re mhomyi: mae botung" ke' to" ru ngad: ra". Jham: Phaug' komiti: yang qo vhin geyang: Thai" mang:- Mae Sai vogaung: mae Mr/ Mrs. Carlson tao we' lho" mo" (6) khye' Jham: Phaug' mau" bokad' lo yaug ngad:- Carlson tao ta" kyo" ra" mhomyi: jham rere: botung" ke' to". (2003- 2006) joe" sho' KBC Laili Laika komiti: Au: jhaung – (2010- 2014) zin joe" sho' KBC Hanson Press komiti: Au: jhaung- (2014- 2018) zin joe" sho' KBC Au: jhaung mau" zo" (2014-2018) zin joe" sho' (MBC-EC) member mae bozaui" lo yaug ngad:.
Lhaovo Byumyu" Qe Yao: Yao" Tung" Ce' Re Ba: O Ngaui Kao Bau: Li" Ra" Khyo
Nhad' yang xo' ta" gyo" lo: ra" mhomyi: saung: seim (Oral) mae lhaovo byumyu" qere: shoqid mae tung" to" ra" tung" ce' qo" mo, ngad: ga: ta" ako". Ngad qere: ana" pyad mae pe" sagse: majo; ra" mhomyi: ngad mung: myidkin dao mae na: ra" tung" ce' qo" ra" byumyu" mae lhaovo qe ma-bobo ngad: ako". Byumyu" myo: sho' wa yao: yao" tung" ce' qo" mo, ngad: ako". Ai: tung" ce' qo" mo, damyo" re wa pha,jhi" ba: ra" Sosona mho" pho" qeyang kad' byid' ako". Ngonhaung" Taungzo: byumyu" qe mae" Phaug'vo- Li:vo- Nan:vo- Za:vo jham wa gatau: byumyu" Sosona mho" pho" qeyang kad' byid: yang: qo" mo, ngad: ako". Ngad qere: ngonhaung" Lhaovo we' Lacid' qe wa Sosona mho" pho" qeyang qu" lhai: pye' qhug' mo, ngad: lo genhaung. Pe"mung: ceru: boe" ru re khag' matho' ba: ta" ngad: ra". Khag' re qobo vhin nae" khyo wa majo, nae" ein: jho: ra". Ceru: yao: yao" tung" ce' maqo" ra" mathao mae- Phaug' tung" ce'- Li: tung" ce' – Nan: tung" ce' jham re boci yang: na: lo: ru wa 1970 joe" sho' ngad: ra". (1940) zin khaung: mae" Dago, Bug- Zao" bug' mang: zug: qe we' lhaovo qe damyo" wa Lhao tung" ce' we' Lhao Jham: Paug' o ngaui kao bau: ra" myid lu" to" li" ako".
China Inland Mission (CIM) Sosona Mho" Pho" John Khune (AYI D M) Re Lhao Tung" Ce' Kad' Byid: Nae" Bao" Thaug' Mho' Ra" Akhyo
Laha mang: Conmunit Asuya lo, mae" Lhao khaung: khyo phao: lo mo, Lisu qe wa (CIM) yang Sosona kad' ru mathao mae Khristan: phung: byu boe" gau we' phung: jhui: qe we' daga" Qhang" Gau"- Qao O- Zao" Bug' mang: zug: qe: mug: myid mae lokhug: na: ako". Ai bam wa tung" ce' re: qo" gau- yao: yao" li: myan" li: thoe khyo"- li: tung" ce' ci yang: qu" kao bau taung" Mao"So re caung:khin" – caung:pa" yang: lona: ako". Azhao: mae" Lhao tung" ce' re o ngaui kao bau: na ko" ra" mang: zug: qe we' lhaovo qe wa je yang: yao: yao" tung" ce' qo" nae" khyo re kao bau: li" ako". Ai: mang: zug: qe mae" Au: jhaung khyo" jhui" au: she yaug wa zug: Cao: Je: Dau: Khao ngad nhaung. Lisu mho" pho" qe wa Lhaovo qere re: Yesu khyad' yu: ra" Ngaui Bau" Lau Dao: re kho" kyo: byid' ako". Ai: apyad mae KBC Sosona mho" pho" qe wa Dago, bug- Qhang" Gau"- Qao O mang: khyo maqo" joe" shi" ra" ayo, ngad: ra". Lisu mho" pho" qeyang kho" kyo: yang: Lhaovo mang: zug: qe we' vobyu qe myo: sho' Khristan: boe" lo: ako". Lisu mho" pho" qere jeju so: nae" khyo ngad: ra". Ai: mho" pho" qe wa- Mha"kho"- Nho" Pha Si"- Thao" Khao- Samuye Pha (Nho"ka" Lathaung:) Lau: Dang Gyung" Khao bam ngad: ako". Sao qhid' Khristan: boe" lo mo, wa Yojao: Hhao" Dau: we' yham byu qe ngad: ako". (1935)
Laha mang: mae" (CIM) Sosona mho" pho" John Khune (AYI D M) wa (1946) zin mae Lisu phung: byu qere kam: nae" qhid' mae" Yojao: khaung:- Sag' Kaug' khyo joe" li" ra". Jham: mugsug' mho" byid' ru we' phung: zo: qere qam: byid: mho" shid' byid' ra". Lhaovo qere: yao: yao" myan" khyo" yao: yao" tung" ce' re ci yang: Mao"So re caung:pa" nae"- Mao"So: mungdao: re Lhao myan" Lhao thoe khyo" nghe' xeim: yu nae" kao bau: na gau ngad mung: Qham pahung mae qham: phyid' yang: mho" pho" (AYI D M) John Khune re Lisu mho" pho" qe bao" thaug' yang: Lhao tung" ce' we' Jham: mugsug' kad' byid: nae" qhid' mae" tarha" vao bao" thaug' mho' ako". Mho" pho" re Lhaovo: sam" ve, maibau: jhaung qhu" byid' ako".
Ceru re qu" ra" au:- Lhaovo qe tung" ce' o ngaui kao bau: ra" myid wa Mao"So re yao: yao" myan" khyo" caung:nghaui" – caung:pa" nae"- yao: yao" myan" khyo" Mao"So: mungdao: re nghe' xeim: yu nug: ra" mathao mae kao bau: thug' li" ra" myid ngad: ra". Byumyu" sam" ve, tau: to' nae" qhid' mae" mangad: nhaung. Ceru wa bobo ngad yang: re: aqao: apan- qao: tae tau" da: ru mangad: nhaung ein: ru re myid: beim: qo: ra". Lhao tung" ce' wa lhaovo qe alhab' lalam lakhug we' tin" ru mae ci yhung: nae" ru wa qao: tae kao bau myid ngad: ra". KBC Lhao Jham: Phaug' komiti: wa ce: mhaug' khyang re mashad' lo: jhui" au: she: na: ru ngad: ra". Lhao tung" ce' re o kao bau: ra" Lhaovo shid' phung: na: ako". KBC Lhaovo qe wa lalam lakhug khyo" o kao bau mung: gatau daphung: wa byumyu" sam" ve, jhid' myid khyo" o kao bau mo, ngad: ako". Lhaovo qe majho" zhaung" ru wa ce: mathao mae ngad: ra".
Sao qhid' Lhao tung" ce' re o kao bau mo, wa Mao"So re lam khug: ru mae" je yang: Myidkyina Vomo" lhao" majoe" qu" mo,- pha,jhi" jung mado; qu" mo, ngad: ako". Nyam" mug: khyo na: byo: lo" ra" Lhaovo qe wa mang aja: ja: mhang" yu mung: jung pha,jhi" azhao" myo: sho' ba mo, ai: yo, mae gyai na: bam va" ru re the' myao: ra". KBC Jhaung Qham boe" lo" nae" qhid' mae" sao qhid' qid nyhab' kham: ra" byu (7) yaug mae lau: de; Nang Zing Yung Wa ga: yaug bobo: ra". Lhaovo zao" bug pho" ngad: ga: ta" ako". KBC Jham: Jung sao qhid' do, mo, mae bobo: ra" Rev. Damau Naw wa Lhaovo zakhaung: ngad: ga: mhomyi: mae bo: ra". Shophaui khaung: mae ce: ayo, mae Rev. Shizo: Khao Phung: Eib kad' na va". Pe" mangad: yang: re: Dago, Bug Lhao khaung: mae na mo, wa byumyu" jhid' myid we' lalam lakhug khyo mae Lhao tung" ce' we' Lhao Jham: paug' o kao bau: ra" apan aqao:- qao: tae ngad: lo genhaung. Aimung: ce: Lhao Jham: Paug' re Dago, Bug myan" khyo" tung" to: nae" qhid' mae" alhang lhang phyo" phyid' myid vang" to" ru ngad: ra".
Mho" pho" John khune re: Lhavo qe bao" thaug' mho' ko" ru we' dakhyo: kad' byid: nae" ga: dao: so: byid: co' ra". Airu: mung: Lhao tung" ce' kad' ru mae mau" vin bao" thaug' byid: nae" komiti: rere: phung" ako". Ai: komiti: nhag' bo qe wa-
Zug:. Cao: Je: Dau: Khao (Au: jhaung) - Yojao: Vogaung:
Lau:de;. Vokau Leim" Dau: (Komiti: vao) - Yojao: Vogaung:
Lau:de;. Vo, Phad' Dau: Leim" (Komiti: vao) - Vo, Phad' Vogaung:
Lau:de;. La Zao Leim" (Komiti: vao) – La Zao Vogaung:
Lau:de;. Lalhao Ze Leim" (Komiti: vao) – Voxe Vogaung:
Lau:de;. Yojao: Qhao" Dau: (Komiti: vao) – Ku"mo" Vogaung:
Lau:de;. Khyao Lao: Khao Leim" (Komiti: vao) - Khyao Lao: Vogaung: bam ngad: ako".
(1949) zin joe" lao"- (CIM) Sosona mho" pho" John Khune wa Mr/ Mrs Carlson tao re myan mang: khyo" Lhao khaung: Sag' Kaug' vogaung: khyo Lhao tung" ce' we' Lhao Jham: Paug' kad' nae" qhid' mae" nhao: ke' va".
Mr/ Mrs Carlson Tao Lhao Khaung: Khyo Li" Ko" Ra" Akhyo
Mr/ Mrs Carlson tao wa Rev. John Khune yang nhao: ke' ru we' dakhyo:- (1950) zin mae Myidkyina khyo joe" do, lo: ako". Myidkyina mang: mae Soswna kad' na: ra" American Baptist Mission (ABM) re Au: jhaung kad' na: ra" Rev. Herman Tedgenfield re yeqhug' mung: Lhaovo qe: Sosona we' tin: yang: ta" kyo: va". Ai lao"- Rev. Herman Tedgenfield wa ceru: lham: ta" ga"- Ni" shid' yaug Lisu qere kam" wa Sosona lo" kad' ge,- ngad qere: Lhaovo qere wa Sosona dalo" kad' ge,- pe"mung:ga" re Lhaovo qere wa ngonhaung" Sosona kad' na gau ngad va" ga: lham: ta" ra". Ai: ayo, mae wa ana" pyad re" ru: yao: yaug yao: Sosona jho" lhad' kad' ra" ayo, mangad: shi:- Sosona Jhaung Qham yao: cao: kyodam: to: yang: Sosona kad' ra" pyad ngad: ra". Yao: cao: aso: jho" to: yang: jho" phug' te' ra" apyad ngad:. Thao re Lhao khaung: mae" Lisu phung: byu qere (CIM) khyo" maqo" gai: kam: lao"- Lisu phung: byu alhab' we' phung: jhui: mo, alhab' re KBC Qid Nyhab' Phung: byu qe khyo" na genae" qhid' mae" ABM Sosona Au: jhaung Rev. Tedgenfield re ab byid' to: co' ako". Aimung: Lhao khaung: mae" Lisu phung: byu qe wa KBC Qid Nyhab' Phung: byu qe khyo" na: lo" ako". (1982) zin mhomyi: tung" yaug Naung Nang Jham: Jung do; na shi" au: (4, April, 1982) zin: zin Mile Xe Jaw Masat Votham: mae kad' ra" Myidkyina Vomang: Volo qham phaung mae (LBC) Lhasi Qid Nyhab' Phung: Jhaung Qham (Lisu Baptist Convention) ga: co' phyid' mang mhang" byid' ke' ako". Ai: ba mae" lhasi qe wa KBC mae ma-bobo lo:. (CIM) Sosona Jhaung Qham re thao re Over Sea Mission Fellowship (OMF) ga: mang lhai" pye' ru we' Sosona kad' ra" lai re: lhai" pye' ako". Ce: mathao mae (CIM) Sosona mae bobo mo, wa Sosana Jhaung Qham re (OMF) ga: ta" ako". Ngadqere: azhao: (CIM) Sosona kad' mo, myo: sho' (OMF) re ma-o yang: thang: pye' ako". Mr/ Mrs Carlson tao re: (CIM) Sosona mau" mae" thang: pye' yang: Lisu qe: tung" ce' we' Jham: Paug' kad' mau" re kad' na: ako". Lisu khyo" concordance re kad' thug' ru tao ngad mung: tung" ce' mau" mae jhao: ako".
Lisu phung: byu qe myo: lo bug (MBC) mae xo' ra" Lisu Baptist Convention mae bobo: lo" ako". (CIM) Saosona mae phung: byu boe" lo" mo, damyo" wa- Lisu Baptist Convention mae ma-bobo ngad: ako". Yao: bam wa Qid Nyhab' Phung: byu qe mangad:- Lisu Khristan: qe angad:- (OMF) we' xo' taui: yang: gatau kho' thug' lo" ako". Myan mang: mae ngad lao" wa (LCC) Lisu Christian Church ga: mhang" mung: (MCC) mae bobo: ako". Lhao khaung: mae" phung: jhui: ayin" qe we' phung: byu ayin" qe wa (LCC) mae bobo: ako". Ce: (LCC) mho" pho" qe wa Lhaovo LBC Phung: phung" ru mae gyai bao" thaug' byid' lo: ako". Rev. Herman Tedgenfield yang Lhaovo qere Sosona makad' nae" lham: ta" ngad qere: Carlson tao wa Lhao khaung: khyo do, lo" mung: Sag' Kaug' vogaung: mae lo" thang: na: ako". Yao: tao myid: ci: ru wa- Lisu vogaung: mae na yang: Lhao tung" ce' re kad' byid: nae" ga" ru ngad: ga: mhomyi: tung" yaug re ta" kyo" ako". Lhao tung" ce' kad' nae" seim" nyhang" ako". Ce: khyo re Lhaovo qere mata" kyo: lo: zug' to" ako".
Lhaovo Qe We' Lisu Qe Agyo: Mae Gye Boe" Thug' Li" Ra" Akhyo
Ceru: boe" ra" khyo re Lhao zug: qe we' Lhaovo qe wa Lisu qe: dao mae aug' o: myid bo: thug' li" ako". Carlson tao wa Lhao tung" ce' kad' byid: nae" qhid' mae" joe" li" ngad qere: Lhaovo vogaung: mae ma-na lo: Lisu vogaung: Sag' Kaug' mae za: na: jo; ru wa Lisu mho" pho" qe kad' ru ngad:. Lhaovo qere mhug' pyag' zo: va" ga: myid: jho: ako". Aimung: Zug: Cao: Je: Khao we' Lhaovo lau:de; qe wa Lisu mho" pho" qere gye kad' li" ako". Lhaovo vogaung: khyo Lisu mho" pho" qere tarha" makho" nhao- makam: nhao ngad: ako". Zug: Cao: Je: Khao Au: she mung: Lisu mho" pho" qere makhai lo: Khrismad poe jhui" kad' ra" sao qhid' Lhaovo qe cin cin kad' ra" Khrismad poe khyo mhomyi: tung" yaug yao: pho" pht. Lalhaug' Gyung" (Qhang" Gau" Buga" Phung:) re: ye: boleim" ra" khyo re ta" kyo" ra". Thao: zin kad' ra" poe khyo wa mho" pho" qe maba lo: kad' ru ngad mung: maye: lo:. Ai: yo, mae Lhaovo phung: byu qe na ngad qere: mho" pho" phung: jhui: khyo" khag' mana shi:. Lisu qe we' gatau tau kad' lo" na: ako". Gye ave, kad' qhu" ru we' thao re Lisu mho" pho" qere we' Carlson tao re se' pye' nae" seim" mung: khoyaug re khag' se' zai ga: qo jho" gae ko" ga". Jemung: Rev. Samuyepha we' Carlson tao re se' nae" qam: ke' li" ko" ga". Rev. Samuyepha wa Rev. Tedgenfield yang myidkyina lagyo: phaung mae tarha" vao Qhang" Gau" Buga" Phung: nho: Yao zam: mo" khyo" san: to: qhug' ra" yaug ngad mung: buga" phung: mae bobo: ra" Lhaovo vogaung: jham khyo phung: kam" qin" ra". Rev. Samuyepha re se' nae" qhid' mae" qo yu yaug wa Vo, Phad' Gyung" Dau: Leim" ein: ra" yaug ngad: ga:- Rev. Samuyepha yao: mhomyi: tung" yaug re ta" kyo" ra". Mao"So: jeju khyo" lau:de; Lamam: phug' yang ta" peim: yang: lham: na: ra" khyo maye: lo: kao so' loe; ra" khyo ta" ra". Thao re Vo, Phad' Dau: Leim" wa Rev. Samuyepha re li" taung"ban" ga". Ceru: boe" ra" khyo re myidkyina mae" Rev. Tedgenfield the' gyo: lao"- ai: ayo, mae Laug Khaung: bam zug: kad' na: ra" zug: Gawlu Balawng La re vhin tung" vhin: ke' mung: Carlson tao re khai: yu nhao: ra". Zug: Balawng La wa pya:da: dayaug re vhin tung" tung" yang: Carlson tao re jhui: nhao: ke' ra". Vhin tung" mae- Ni" shid' yaug ai mae magai: na lo:- ce: vhin tung" lobyid: yaug we' phyad gyo" lo geri: ein: ru ngad: ga: Carlson yao: ta" kyo" ra". Airu: mung: Carlson tao wa Lisu qeyang vo; dai" yang: Sag' Kaug' vogaung: mae" phao: gyo" lo" mung: (Molamyan:) cid' yung" mae zashao lo" khau co' yang: Thai" mang: Bangkok vomo" mae lo" joe" na: ako". Lhaovo tung" ce' mau" zo" wa cemae dalhang baui" byaug va". Zug: Cao: Je: Khao we' Lhaovo mang: zug: ade, qe wa Lisu mho" pho" Rev. Samuyepha re qobo zhaug' mung: Rev. Tedgenfield re mugsug' tung" yang: shaug: ta" ko" ga". Yao: bam zhaug' ra" qobo jham wa Rev. Samuyepha wa- Lisu we' Lhaovo qere myo, nho kho' yang: mau" kad' ra". Phung: alu: ngaui jham re yao: o: ra" khyo" ci: pye' ra". Lhaovo qere makho' byid: myi-am kad' aung: zo: mung: phaga: kad' ngaui qho zo" ra" ein: ru ngad: ga". Ceru: qobo zhaug' yang: shaug: ra" mau" mae Rev. Pha,la Hhao" Dau: bobo: ra" khyo re Rev. Samuyepha tung" xam" ci: ra".
Ce: mathao mae Rev. Tedgenfield wa Myidkyina lagyo: phaung khyo zug: Cao: Je: Khao we' Rev. Samuyepha re khai: khyo" yu mung: nyang" za: myid' ca: qu" byid' ra". Khoyaug shad' ru re ba lao" zabhaung bin thao Cao: Je: Khao re khai: zhaung: to: mung: zoboe" re theim yang: Cao: Je: Khao re lo, nyhug' ceim: yang: satan- satan- satan ein: ta" ga". Nao re phung: mau" khag' yang kad' nhao: i"? khag' amin" yang kad' i"? nao thaung: laung" nug: i"? ana" ngo nao re taui" lhaung" pye' nae"- nao shad' i"? mashad' i"? Ce: mho" pho" qe we' phung: mau" daga" lo" kad' nae" i" ein: myid: lao" – Ngo shad' va" ana" mae" wa Lisu phung: jhui: mo, we' daga" lo" kad' naeva" ein: yhin" yu: ga" ru re Rev. Samuyepha yang ta" kyo" ra". Zug: Cao: Je: Khao wa Yojao: joe" lao" yui lo" zho: mung: na: ru mae" thao re wa phung: dam: vao: ra" khyo Pht. Lhaug' Gyung" ta" kyo" ra". Ce: mhomyi: re Lhao tung" ce' qo" yu nae" khyo mae bo: ra" boe" khyo dalam: ngad: ra". Cere qu" ra" au: Carlson tao wa boe" ra" khyo re de: de: mata" kyo: anyham: avho' mau" kad' ra" mathao mae Lhao tung" ce' o kao bau: na: ra" Lhao zug: qe we' Lhaovo qe wa pe" ru: boe" ra" khyo re maca: qu" lo: phung: mau" re tau: lhan: yang: mau" kad' lo: ra" qobo bo: ra". Khyag' ga" re Lisu mho" pho" qe wa Lhaovo qere bao" thaug' byid: mo, za: angad: lo genhaung. Lhaovo qere gye kad' mo, mangad: bao" thaug' mo, ngad: ako". Lhaovo qe wa lalam lakhug phung: mau" mae salhe: gyai kad' mo, ngad genhaung ein: ru re the' myao: ra". Rev. Samuyepha we' Lisu phung: jhui: mo, wa Lhaovo qere qobo khyad' byid: yang: lalam lakhug mau" mae jhui" au: she: lo ko" ru wa mhomyi: tung" yaug li" bomyao sho' ngad: ra". Mho" pho" Lisu phung: jhui: mo, re Lhaovo qe gyai jeju so: nae" khyo jo; ra". Apyad ato mae jeju beim: so" na gelang:.
Lhao Tung" Ce' Kad' Thug' Nae" Mau" Dam: Qhid: Ra" Khyo
Mho" pho" Carlson tao re: Lhao tung" ce' maqo" kad' lo: dam: phao: lo" byaug: ako". Ngadqere: Mao"So: jeju khyo" (1953) zin joe" lo lao" Myidkyina Sosona Jung we' man: khyin: jung khaung: mae jung pha,jhi" zhao: na ko" ra" Lhao nau"- Lacid' nau" qe wa qug: khai: qhug' lo: au: jho" bao" thaug' nae" qhid' mae" ngaui qho komiti: dalam: phung" ako". Ai bam wa-
Lanyhoe" Ze Dai
Lhug' Boem
Lang No; Sin Va"
Lanyhoe" Ze Dau:
Lang: No; Lu Khaung: bam ngad: ako".
Cera" komiti: mae zolau: Lanyhoe" Ze Dau: wa Lhao tung" ce' kad' nae" alhang lhang ta" thug' ngad yang: re: lo, qaug maboe" thug' li" ngad: ra". (1958) zin shophaui vogaung: mae Myidkyina vomang: Taungzo: Qid Nyhab' Phung: volo phaung kad' ako". Ai: qham phaung mae Lhaovo- Lacid' tung" ce' kad' nae" komiti: re tarha" vao phung" ke' ako". Ai bam wa-
Zug:. Lagui Kyang" Lhug' (Au: jhaung)
Zug:.Lashu: Khao Leim" (Bao" thaug' au: jhaung)
Lau:de, Lanyhoe" Ze Dai (Mau" sang)
Zug:. Boem Lang" (Ngaui zam:) bam ngad: ako".
Ce: komiti: wa ngaui qhang qho: yu mung: Putao mae Sosona kad' na: ra" Khristu phung: mae" mho" pho" Robert Mose we' xo' taui: mung: Lhaovo- Lacid' tung" ce' kad' byid: nae" bao" thaug' mho' ako". Aimung: Lhao- Lacid' myan" jhau nae" qhid' mae" lau:de; Shizo: Hhao" Leim" we' lau:de; Cang" Ze shid' yaug re Putao khyo nhao: ke' ako". Robert Mose wa Lhaovo tung" ce' amyhi" shid' ja:- Lacid" tung" ce' amyhi" shid' ja: re kad' byid: mung: yao: yao: o: ra" ja: re khyin: yu nhao: ra". Komiti: qe nyang" ca: qu" ko" re qo ca" ru myo: sho' bo: ru we' tung" ce' atug' aqhui: ngad: ru: yang ai: ra" Lhao tung" ce' amyhi" re makhyin: yu ngad: ako". (1962) mae Taungzo: jham lamyan Asuya re tau: lhan" ra" gye poe jo; thug' li" yang: Lhaovo- Lacid' tung" ce' kad' ra" mau" zo" wa dalhang dam: thang: byaug va".
Ngadqere: Lhaovo- Lacid' byumyu" qe yao: yao" tung" ce' re myid o kao bau: ru wa mathang: byaug ngad: ra". Asuya khyo" re: qam: byid' ra" khyo dam: jo; lo mung: (1965) zin May khye' (8) ba man: khin: vogaung: mae na: ra" zug: Lagui Kyang" Lhug' yham mae Lhaovo- Lacid' tung" ce' kad' thug' nae" komiti: re o mae" we' dakhyo: dam: nyhang" phung" ako".
Zug:. Lagui Kyang" Lhug' (Au: jhaung)
Zug:. Lashu: Khao Leim" (Bao" thaug' au: jhaung)
Lau:de;. Lanyhoe" Ze Dau: (Komiti: vao)
Rev. Vano; Khao Zaung" (Vano; La) (Komiti: vao)
Lau:de;. Robert Cang" (Komiti: vao)
Lau:de;. Cang" (Komiti: vao)
Lau:de;. Lazad Dau: Leim" (Mau" sang)
Ce: komiti: wa Lhao- Lacid' tung" ce' myhi" qo" yu nae" qhid' mae" Lhaovo- Lacid' qere yao: yao: kad' to:- tung" to" ra" tung" ce' myhi" jham re vhin: ke' byid: genae" qhid' mae" hau" pyo: ke' ako". Ai we' dakhyo:
Lau:de;. Lanyhoe" Ze Dau: tung" to" ra" tung" ce' myhi" daja:
Mr. Robert Mose tung" to" ra" tung" ce' myhi" daja:
Mho" pho". Laqhung: Hhao" Leim" tung" to" ra" tung" ce' daja: mung: sam ja: the' yu: ako".
Sae" mang: Kudkhai mae" mho" pho" Jau Luka Laqhung: Hhao" Leim" kad' to" ra" Lhao- Lacid' tung" ce' myhi" wa Lhao- Lacid' myan" je: yang: jab byang" ru we' ci gai: ru re komiti: khyo" the' myao geyang: ai re khyin: yu: ako". Aimung: (1967) zin November (16) ba aso: (4) tho' zhao" jung- qe, mo" mae kad' ra" Lhaovo- Lacid' volo phaung mae"- 1. Lhaovo qe wa Lhao tung" ce' tung" ru mae Lhaovo myo: lo bug jhau: ra" Dago, Bug myan" re ci yhung: nae" phyo" phyid' ako" 2. Lacid' qe wa Lacid' tung" ce' tung" ru mae Lacid' myo: lo bug jhau: ra" Lacid' myan" khyo" tung" ce' ci: yu nae" phyo" phyid' ako". Airu: mung: Dago, Bug Lhao myan" jhau nae" zug: Beom Cang" shid' yaug re (1968) zin mae sae" mang: kudkhai mae na: ra" mho" pho" Jau Luka Laqhung: Hhao" Leim" jhao" nhao: ke' ako".
Yao: bam wa komiti: myid vang" phyo" phyid' ru we' dakhyo: (1967) zin Oct (22) ba mae Lhao tung" ce' myhi" we' Lacid' tung" ce' myhi" paug' re kad' thug' ke' ako". Ai: tung" ce' myhi" paug' shid' lam: re (1968) zin June (15) zug: Phug' Jaung Dau: Khao yham mae kad' ra" komiti: zabphaung mae myid vang" jao dang yu yang: khae: yu: ako". Airu: khae: yu: to" ra" tung" ce' myhi" re re: jab byang" sho' nyhang" tung" nae"- o mae" we' dakhyo: komiti: jham re qo vhin: ako". Lhao tung" ce' myhi" re
Lau:de;.Shau Vha: Dau: Leim"
Lau:de;.Lazad Dau: Leim"
Zug:.Lashu: Khao Leim"
Zug:.Phug' Jaung Dau: Khao
Lacid' tung" ce' re
Zug:. Lagui Kyang" Lhug'
Zug:. Boem Cang"
Mho" pho". Yo Boem
Mho" pho". Robert Cang"
Mho" pho". Cang" Boem bam re qo byid' ako".
Ce: komiti: qe wa sao qhid' nghe' paug' re kad' yang: (1968) zin Dec (29) mae kad' nae" ngad: ra" komiti: qham phaung mae kai" qhu" nae" phyo" phyid' ako". Aimung: (1968) zin Dec (29) mae Lhao tung" mho" qhid paug' re qo" kai" qhu" ako". Lacid' mho" qhid paug' re wa maqo" kai" qhu" shi" ra" khyo re zug: Boem Cang" khyo" sho' kyo" ra". Ai: qham phaung mae zug: Boem Zung" phung: qe wa- Lacid' tung" ce' kad' ru mae Lhaovo qe we' maqhan: lo: gelang: sab' komiti: phung" yang: kad' ye" lo" nae" khyo: Tho'go,- Shophaui mae na ko" ra" Lacid' qe phyo" phyid' to: va" khyo re ta" ako".
Ce: mathao mae (1969) zin Feb (6) ba mae kad' ra" qham phaung mae Lhao- Lacid' tung" ce' kad' thug' komiti: re thang: pye' ako". Aimung: Lhaovo qe wa kad' to: va" ra" Lhao tung" ce' myhi" re mho" qhid paug' boe" sho' kad' thug' nae" komiti: re dam: phung" ako". Ai bam wa
Zug:.Lanyhoe" Hhao" Dau: (Lanyhoe" No:) (Au: jhaung)
Zug:. Lashu: Khao Leim" (Bao" thaug' au: jhaung)
Zug:. Lazad Dau: Leim" (Mau" sang)
Zug:. Lamaung: Khao Hhao" (Bao" thaug' mau" sang)
Zug:. Phug' Jaung Dau: Khao (Ngaui zam:)
Lau:de;. Xan"kha" Leim" Dau: (Japhin: ca)
Zug:. Lapyho: Khao Dau: (Japhin: ca)
Komiti: vao (68) yaug bobo yang: Lhao tung" qhid paug' re xo' yang: kad' ye" lo" ako". (1969) zin Feb (18) ba mae kad' ra" qham phaung mae (1962) zin March (27)Vai" Mo: agyo: zhao" jung yham mae kad' ra" qham phaung mae" phung" qhid: to" ra" Lhsaovo Sam" Ve, komiti: we' Lhao tung" ce' kad' komiti: shid' lam: re qhan" pye' yang: Lhaovo Sam" Ve, we' tung" ce' komiti: ein: nyhang" pye' ako". Lhaovo Sam" Ve, we' tung" ce' komiti: qe wa Lhao tung" ce' lae: ye" ra" mau" re xo' yang: kad' ako".
Vai" Mo: vogaung: mae mho"zo: (15) yaug re khai: yu yang: (1969) zin April (1- 30) ba- lho" shid sho' mho" pho" Lazad Dau: Leim" re Lhao tung" ce' myhi" mho" jham" qu" nhao: ako".
(1971) zin April (1-30) ba joe" sho' mho"zo: (46) yaug re khai: yu yang: Naung" Khyi vogaung: mae lau:de; Va, Bo: Ze Zaung" re Lhao tung" ce' myhi" dam: mho" byid: nhao: ako".
(1972) zin April (1-30) ba joe" sho' mho"zo: (60) yaug re khai: yu yang: Namva: vogaung: mae lau:de; Va, Bo: Ze Zaung" re mho" nhao: ako".
Ce: mho"zo: qe wa vogaung: zao mae mho" phaung (120) lhang kad' yang: mho"zo: (2516) yaug re Lhao tung" ce' myhi" xo' yang: khai: mho" byid' ako". Lhao tung" ce' myhi" mho" byid' ra" khyo abang mabyid nae" qhid' mae" lau:de; Va, Bo: Ze Zaung" re lho" khye' jhaung qhu" (150) kye' bao" thaug' mung: (1,1,71) zin Jan mae" (30,3,74) zin joe" sho' qo byid' lo: ako".
Airu: Lhao tung" ce' re bin: mho" pyao thao komiti: jham wa Lhao tung" mho" qhid paug' re tung" paug' khyo" be; thug' ke' nae" qhid' mae" khyo dam: qho mung: (1969) zin Feb (20) ba- bana te' yang: mung" eib zug: qe khyo azhao" zhao" akhang" mho' ako". Mung" eib zug: qere: azhao" zhao" myid: qu" mung: (1972) zin Sep (21) ba- bana te' yang: tung" so: axam: (718/2072) ကင်းလွတ်ခွင့်အမှတ် (01841) lau:d; Lazad Dau: Leim" Rev. Soboe" Jeim: (Manager- Hanson Press- Myidkyina- address we' Lhao tung" ce' mho" qhid paug' boe" thug' nae" akhyo qo" yu: ako". Qo ca" ru we' dakhyo: alhang lhang tung" paug' kad' thug'- pyo byid: mung: (1974) zin March (29) ba Vai" Mo: tho' zhao" jung yham mae kad' ra" Lhaovo tung" ce' qhaug' phaung mae Lhaovo qere tung" ce' paug' qhaug' byid' ra" mo,phaung kad' ako". Ai: phaung mae Lhaovo volo byu (15000) yaug we' mung"dan: eib: ra" Asuya zug: qe azhao" zhao" mae" zug: ade, qe li" bobo: ako". Lhao tung" ce' re Lhaovo qe yao: komiti: qe au: she yang: zin lam: (20) zin kad' lo" ru mae bobo: lo ko" ra" zug: ade, yaug nge, we' Ayusa zug: ade, Au: jhaung qere Lhaovo byumyu" yaug nge, jeju so: nae" khyo jo; ra". Alhab' re boe" nhao yaug kam" wa Pho" Mao"So ngad: ra". Mao"So: jeju re Lhaovo qe khonhae" re: caung:khin" na ca" ra". Lhaovo qe ce: Lhao tung" ce' re ci yhung: yang: Myidkin dao mae byu damyu" khyo" na: qi: na: qhang baug thug' shang: jhu: sho' na: ye: gelang:.
Lhao Jham: Mugsug' Paug' Phaug' Qhid: Ra" Khyo
Mho" Pho" Carlson we' MaMa Hezel tao phao: lo" thao rere: Lhaovo qe tung" ce' o kao bau: ra" myid wa xo' yang: Lhaovo byumyu" qe mae bo: jo; ra". Aimung: mho" pho" Jau Luka Laqhung: Hhao" Leim" yang kad' thug' ra" Lhaovo tung" ce' re Mao"So: jeju khyo" qo" khae: yu: bam va". Lhaovo tung" ce' wa Myidkin azhao" khyo" ga" re azhao" mamyhi ngad qere: Lhaovo qe yao: kad' yu: ra" tung" ce' ngad: ru: yang Lhao nau" qe alhab' phug' te' yang: ci yhung: ca" ra" wo". Lhaovo byumyu" qe bam mug: mae" nyam" mug: khyo joe" gyo" li" ru we' pha,jhi" laba lajhao mae myo, bung" li" mung: yao: yao" Lhaovo tung" ce' re ci yhung: nae" agu gai the' myao mung: caung:pa" phung: mae Jham: mugsug' we' nghaui" caung: paug' kad' yang: ci yhung" ye" lo" nae" khyo" kad' lo va". Sao qhid' maqhid re Lhao myan" khyo" caung: nghaui" paug' re kad' thug' nae" komiti: phung" yang: caung: nghaui" paug' re kad' thug' ke' va". Phung: khug mae ci yhung" qhid: lo va". Jham: mugsug' paug' phaug' nae" re: mau" vin komiti: phung" yang: qhid: lo va". Ai: ayo, (1970) zin jan" khaung: joe" sho' Lhaovo byumyu" qe wa KBC we' RC AG phung: byu qe khyo" Khristan: boe" na: bam gau ngad:. Myo: lo bug KBC phung: byu qe ngad qere: KBC Jhaung Qham wa phaug'vo tung" ce' re aqao: kad' yang: ci nae" khyo" tau" da: to: gau ngad yang: Lhaovo- Lacid'- Za:vo myan" khyo" tung" ce' we' Jham: paug'- caung: nghaui" paug' gatau makad' byid: lo: za: jhui" lo: ra". Ai: yo, joe" sho' Lhaovo- Lacid'- Za:vo qere: (KBC) Jhaung Qham khyo bao" thaug' ra" khyo pe" re: makad' lo: za: na: lo: ako". Ngadqere: Lhaovo qe wa (1972) zin joe" lao" KBC mae" mho" pho" qe wa Lhaovo Jham: mugsug' re phaug' nae" qhid' mae" byin phyo: qham: phyid' mung: komiti: phung" qhid: lo: ako". (1972) zin August (5-12) ba agyo: Mungna vogaung: (မြို့နယ်တရားရေးဉက္ကဌ) kad' na: ra" Zug: Cao Zang: Leim" Dau: ( Lai: Man" Dau:) mho' yham mae Zug: Cao Zang: Dau: mho' cad'be, lo: dadau: se' zo: yang: byin phyo: qham: phyid' yang: Rev. Tho' She: Leim" Dau: mho' yham mae lhao Jham: mugsug' re phaug' qhid: ke' avako". Ai: bana mae bobo mo, wa-
Zug:. Va, Bo: Ze Zaung" (Vai"mo:)
Rev. Tho' She: Leim" Dau: (Vai"mo:)
Zug:. Cao Zang: Leim" Dau: (Vai"mo:)
Rev. Lanyhoe" Ze Leim" (Mug: Jhid')
Rev. Nhad' Mug' Khao Zaung" (Mang:myan)
Rev. Jeim Qu Leim" Khao (Au:ra:)
Rev. Langhan: Dau: Leim" (Jamga)
Zug:. Lazad Dau: Leim" (Myidkyina)
Zug:. Shau Vha: Dau: Leim" (Vai" mo:)
Rev. Yojao: Hhao" Khao (KBC)
Mho" myhi". Laphyo: Dau: Nao" bam ngad: ako".
Jham: phaug' mau" re Rev. Langhan: Dau: Leim" wa mau" sang qo re yu mung: votham: phung: dalam: mae" dalam: khyo lhang: qin" yang: phaug' lo: ako". Na jo,qo we' zo: shaug' – qo ca" gu: re votham: phung: qe bao" thaug' byid' lo: ako". Mho" pho" qe wa pe" aphug' jhaungqhu" mayu lo: mau" zo" mae qhaug' byid' ako". Ai: yo, mae komiti: zokho ngaui pe" majo, shi: mung: phung: byu qe khyo" bao" thaug' byid' ru dajhid' dathao qo" khae: yu: ako". (1973) zin mae" Rev. Lano, Dau: Gyung" komiti: mau" sang kad' yang: xo' yang: jhui" phaug' lo va". Sao qhid' dau- vai"mo: votham: Jhaung Qham (Wain Maw Association) mae bobo: ra" votham: phung: khaung: mae lhang yang: Jham: paug' re phaug' lo: ako". Phaug' Jham: paug' (Hanson) version re apan to: yang: phaug' lo genhaung. Ana" pyad mae" Jham: phaug' pha,jhi" akhyo pe" re: majo, shi: Jham: mugsug' phung: (Bible Society) we' re: xo' taui" ru majo, - ngad qere: kao bau: ra" myid we' za: kad' lo: ru ngad: ra". Yao: bam khoqhi" lo, zo" joe" sho' qo" kad' ra" khyo re khyag' maba- ngad qere: Ngaui Bau: Lau Dao: paug' damyo" phaug' to: ko" ru re wa the' myao: ra". Pe" ngad ngad sao qhid' Jham: phaug' qhid: lo mo, re ngonhaung" jeju so: ca" ra". Ce: azhao" re zab: thang" mung: xo' yang: qo" kad' boe" ru ngad va".
KBC Jhaumg Qham Khyo Lhaovo Jham: Phaug' Komiti: Khyo" Bao" Thaug' Mho' Mugsug' Tung" Ke' Ra" Akhyo
Ceru: kad' na: ru mae komiti: qe wa KBC Jhaung Qham khyo bao" thaug' mho' nae" qham: phyid' yang: (1984) mae KBC Jhaung Qham khyo mugsug' tung" zaui va". Ai: ayo, mae KBC mau" sang wa Rev. Isag ngad: ra" KBC khyo mugsug' yebyid' ru mae au: jhaung khyo" – Rev. Cao Zang: Leim" Khao we' lau: de, qe ngad: ako". Ngadqere: ana" yao: wa magai: boe" shi: ga: KBC khyo" dao: phyid lham: byid' ke' ko" ra". KBC khyo" mabao" thaug' byid: qere: Jham: phaug' komiti: wa xo' yang: kad' ye" lo" na: ako". Ceru: boe" na: au: qhid' phyao: Sag' Kaug' vogaung: mae li" joe" co' ra" mho" pho" Carlson – Lisu khyo" (A Yi Wu) wa Rev. Nho" Ka" Lathaung: (Rev. Samuyepha) re vhin tung" khyo" ceru: myid' ke' lo: ra". Lhaovo byumyu" qe tung" ce' we' Jham: paug' qo" avako" ra" i"? maqo" shi: ko" re wa ngo dam: kad' byid: nae" ga: tung" ke' lo va". Ce: khyo re Rev. Nho" Ka" Lathaung: wa Lhaovo Jham: phaug' komiti: re dam: ta" kyo" ra". Jham: phaug' komiti: wa ce: dao: re the' gyo: lao" byin phyo: qham: phyid' mung: Thai" mang: mae na: ra" mho" pho" Carlson tao jhao" yexo' taui: nae" jao dang yu va". Mr & Mrs Carlson tao wa Lisu qe: concordance bin: kad' yang: gung" na: ra" ayo, re: ngad: ra".
Mho" Pho" Carlson Tao We' Xo' Taui" Ra" Khyo
Airu: mung: Lhaovo Jham: phaug' komiti: wa au: jhaung ngad: ra" Rev. Cao Zang: Leim" Khao we' Rev. Lano, Dau: Gyung" shid' yaug re Thai" mang: khyo Mr&Mrs Carlson tao re bao" thaug' yemho' genae" qhid' mae" qo byid' ako". Aimung: Lisu Khristan: phung: mae" mau" vin ngad: ra" mho" pho" Daniel Fish re bao" thaug' mho' mung: (1986) zin May khye' mae mho" pho" tao re Carlson we' qhug' nae" Thai" mang: khyo jhui" ye" ra". Ce: gyaung: khyo mae qo ca" gu: re Rev. Daniel Fish – mho" pho" Richard bam bao" thaug' byid' ako". Jeju beim: so: nae" khyo ngad: ra". Tachilig vogaung: mae" Sai Nyunt mho' bang" khug yham mae yethang: ako". Mho" pho" Carlson tao we' yejho" qhug' mung: Lhao Jham: phaug' mau" zo" re bao" thaug' byid: nae" yemho' ako". Mho" pho" tao khyo" re: myid: ca" gu: alhab' myid' yu yang: bao" thaug' byid: nae" qhid' mae" dao: lham: byid' ra". Ai thao ngaui bau: taung" taung mang: khyo dam: tug' phao: lo: ako".
Lhaovo Jham: phaug' komiti: wa zabphaung phaung mung: Carlson tao re ye: bobao" nae" qhid' mae" Rev. Lano, Dau: Gyung" we' Rev. Jeim Phaug' Ze Hhao" shid' yaug re khyin: yu yang: mau" zaui" qhid nae" qhid' mae" Thai" mang: khyo dam: nhao: ke' ako". Carlson wa Lisu qe: Missionary (Retired) ngad mung: Lisu myan" gyai ba yaug ngad: ra". Carlson wa Canada mang: byu ngad mung: Ma Ma Hezel wa American mang: byu ngad: ra". Ma Ma pha,jhi" ba maug: (BA) qo" yaug ngad mung: pha,jhi" je: ba: ra". Qug' ra" khyo wa Carlson tao Lhao myan" dajhid' re: maba: ra" khyo ngad ra". Lhao tung" ce' re wa Bangkok mae na: jo; ra" (G.O.C) myhi" shelly Phaung" Sin yang mho" byid: yang: ba: nghe' ba: tung" qe: ngad: ako". Jham: phaug' ra" au: re Lisu myan" we' English myan" re akaung to: yang: ci ca" ako". Lisu qid nyhab' Jham: jung gyo" Rev. Lano, Dau: Gyung" we' English Jham: jung gyo" Rev. Jeim Phaug' Ze Hhao" re khyin: yu: ru ngad: ra". Ce: mho" pho" shid' yaug re Thai" mang: khyo yejhui" dai" yaug wa komiti: au: jhaung Rev. Cao Zang: Leim" Khao ngad: ra". Ce: lhang mae" gyaung: khyo mae aja: ja: khyo" bao" thaug' byid: mo, wa- Taung:ji" mae na: ra" Bank Manager Zakhaung: Ze Khao mho' – Jhan"dung: mae" Rev. Seim:lut Aung: Sa mho'- Zug: Lasham" mho'- Rev. Seim:lut David bam: yang gyai lham: bao" yu ko" ra" khyo ce: mhomyi: mae botung" ke' to: va". Ta:ci:lig' joe" we' mho" pho" Labya La Doi yang gyai bao" yu: ru khae: yu vako" ra". Ta:ci:lig' vogaung: mae" U.Tsai nho: Guest house mae yethang: na mung: Mesai te' mae na: ra" Carlson shid' tao we' Jham: phaug' mau" re yebao" kad' ako". Marku Ngaui Bau" Lau Dao: paug' re bin: phaug' to: co' yang: Jham: phaug' byu tha" ca" mathao mae (1988) zin August khye' re taung mang: khyo dam: phao: lo: ako". (1989) zin re byu atha" mathe' qho shi: mung: Rev. Lano, Dau: Gyung" re za: Jham: phaug' nae" dam: ye: nae" phyo" phyid' yang: Rev. Cao Zang: Leim" Khao yang dam: yedai" ra". Rev. Lano, Dau: Gyung" wa Carlson tao we' Jham: phaug' mau" zo" re yebao" byid: va". Rev. Lano, Dau: Gyung" wa noqam" gyai no mung: yao: re bao" thaug' nae" byu phyad nhao byid: nae" qhid' mae" komiti: khyo pyang: ke' mung: komiti: khyo" byu dam: qho: ako". Rev. Lalhaug' Gyung" Khao re khyin mung: (1989) zin June khye' (15) ba mae Rev. Cao Zang: Leim" Khao yang Taung: Gyi" Hehu airport mae li" cao" dai" ke' ra". Rev. Lalhaug' Gyung" Khao wa KBC mae" Lhaovo Jham: mugsug' phaug' nae" akhang" byid' ra". KBC EC 31/89 pyho" phyid' aso: qo" thao re mau" vao yaug ngad:. KBC Jhaung Qham khyo" appointment byid: mung: lho" khye' jhaung qhu" we' staff dayaug khyo" tarha" vao Lhaovo Bible Translator boe" lo: ra". Ce: qhid' phyao: wa kao bau yang: komiti: khyo" za: qo yu yang: phaug' lo: ru ngad:. Mao"So: jeju re caung: nae" khyo ngad va". Ai: zin na gyo: mae KBC Laili Laika komiti: wa Rev. Dr. N-Gan Tang Gun ngad: ra". Lhaovo Jham: phaug' mau" zo" wa KBC Sosona mau" zo" dalam: ngad va" ra" mathao mae KBC Laili Laika komiti: au: jhaung Rev. Dr. N-Gan Tang Gun wa Carlson tao rere: Lhaovo Jham: phaug' mau" zo" mae tarha" vao bobao" kad' nae" qhid' mae" Chief Translator khyo" mau" byid: yang: vhin tung" we' daga" Rev. Lalhaug' Gyung" Khao lo, mae bovhin: ke' ra". Rev. Lalhaug' Gyung" Khao Thai" mang: ye" ra" gyaung: khyo mae qo ca" gu: bobao" thaug' byid: mo, rere: mhomyi: mae boke' to: va". Ai bam wa Bank Manager Zakhaung: Ze Khao mho' – Taung:ji" mae na ko" ra" KBC phung: byu qe Jhan"tung: mae" pha,jhi" zug: Sumlut Moshe yham byu qe gyai bao" thaug' byid' ako". Ta:chi:lig' mae Rev. Lano, Dau: Gyung" we' yeqhug' mung: thao: ba re Carlson we' mau" daga" yezaui: va". December khye' joe" sho' mau" ye: bocao: kad' va". Yohan paug' mae" Roma vhin tung" joe" sho' bin: phaug' va". Carlson tao wa King Jame version re apan to: mung: (Word to word) dao: kheim: dakheim: re: mashad' lo: qo" bobo sho' phaug' ra" lai re ci: ako". England myu" mae" Trinitarance Bible society yang qo yu yang: kad' ru ngad: ra". Ai mung: ca" qo: ra" alu: ngaui qhang re wa Carlson tao khyo" cao" mho' yang: ci yhung" ra" khyo re ta" kyo" ako". Yao: tao: yham byu banam qe mae" bao" thaug' mho' yu: ra" khyo ta" kyo" ra".
Alu: ngaui qhang we' tin: yang: pe" macao: ba byid:. Zo: shaug' we' na jo,qo phug' re dalaban re dalhang Autual expanse re ta" kyo: lao" phoe' byid' ra". Lho" khye' jhaung qhu" we' gatau aphug' pe" mabyid:- ve, mai ve, bau: ca" lao" mho' au: tab za: phoe' byid' ako". Qug: khai" ru myo: sho' kham: pye' va". Mao"So: ngaui ngad mung: tu" yang: ci yhung: ca" ga: ta" ako".
Carlson We' Kad' Ra" Mau" Thang: Pye' Ru
(1989) zin joe" sho' Lhaovo Jham: phaug' komiti: wa dalam: za: ajo, lo". Ngadqere: (1988) zin khan: mae" LBC phung: boe" thug' li" va". (1989) zin October khye' mae- Rev. Langhan: Dau: Leim" khyo" vhin tung" dakhye' Carlson re vhin: ke' nhaung. Phaug' mugsug' khyo" tung" ru ngad: ra". Rev. Lalhaug' Gyung" Khao: yang English myan" khyo" myan" phaug' kyo: va". Vhin tung" mae- Lhaovo qe wa KBC mae" thug' mung: LBC phung: phung" to: va". Aimung: ana" jhui" kad' na: ra" Lhaovo Jham: phaug' komiti: wa tarha" mavao- aimung: Rev. Lano, Dau: Gyung" we' Rev. Lalhaug' Gyung" Khao shid' yaug re: tarha" mavao. LB) khyo" phung" to" ra" Lhaovo Jham: phaug' komiti: we' daga" zaui" ye" ru za: tarha" vao ngad: ga: tung" to" ra". Ai we' dakhyo: Lhaovo Jham: phaug' mau" zo" re kang pyi ke'- aqug: akhai: bokad' yaug wa David Fish ga" ra" Lisu pho" ngad: ra". Yao" yang Carlson re vhin tung" aja: ja: tung" vhin: ru re the' nghe' yang: ba: yu: ru ngad:. Good News Bible re ci mo, ngad:- KBC Lhaovo phung: byu qe wa Heresy ngad: ako". LBC phung: wa jo: ru ngad: ga: tung" ke' ra". Pe"mung:ga" re ce: David Fish wa Lisu Baptist Convention mae" Lisu Christian Churches ga" ra" phung: re jhui" au: she yaug ngad: ra". LBC phung" nae" gyai qam: byid' lo yaug we' pha,jhi" byid: yaug ngad: ra". Ceru" ra" vhin tung" jham – lau dao: jham re the' gyo: lao" Carlson tao re: aug-o: myid bo: li" ako". Pe"mung:ga" re genhae" yao: shid' tao we' mau" daga" zaui" lo: ra" Rev. Samuye Pha ta" ra" dao: re gyai lam" byaug: ra". Ai lao" ceru: boe" li" ra" KBC Jham: phaug' komiti: we' maxo' lo: nae" – Rev. Samuye Pha we' Jham: phaug' mo, we' za: mau" zaui: nae" khyo" kad' li" ra". December joe" lao" mau" dajhid' thang ca" mathao mae Rev. Lano, Dau: Gyung" we' Rev. Lalhaug' Gyung" Khao re yao: jhao" khai: yu mung: Carlson tao we' mau" yedam: li" kad' nae" Carlson yang pyang: ke' ra" khyo ta" ra". KBC Lhaovo Jham: phaug' komiti: we' wa maxo' kad' nae" khyo ta" ra". Alao" Rev. Lalhaug' Gyung" Khao wa ceru: phaug' ta" ra". Yao: wa KBC Lhaovo Jham: phaug' komiti: qeyang san: to" ra" byu dayaug ngad: ru we' KBC phung: mau" vin byu dayaug ngad: ru: yang KBC Lhaovo Jham: phaug' komiti: yang Pza: manhao re wa ai: Jham: phaug' mau" re maqo" bokad' nae" ga: ta" pye' ra". Carlson tao re: alhang lhang vhin tung" khyo" khai: ako". Ngadqere: magai: boe" ra" khyo re vhin tung" khyo" phaug' ke' ra". Aimung: (1990) zin mae" wa KBC Lhaovo Jham: phaug' mau" zo" re Carlson tao we' makad' lonae" khyo byin phyo: qham: phyid' yang: thang: pye' ko" ra". Carlson we' kad' ra" Jham: phaug' mau" cemae thang: pye' ra". .
Myan Mang: Jham: Mugsug' Phung: We' UBS We' Xo' Taui" Ra" Khyo
(1990) zin mae yao: KBC Laili Laika komiti: mae qham: phyid' mung: Lhaovo – Lacid' Jham: phaug' mau" project re KBC mau" sang khyo" Myan mang: mae" Bible Society khyo translation project khyo" byid: nae" qhid' mae" mugsug' tung" ke' ra". Ai: ayo, mae Myan mung" Bible Society mae" mau" sang wa Rev. Than Thun Myat ngad: ra". N-T Bible Consultant wa Rev. Stephen Rhekio kad' na: ra". Bible Society mae" project ma-khyo" byid: shi: ngad qere: Jham: phaug' lo, zo" jo, gau ngad mung: Carlson we' phaug' to" ra" Lhaovo Marku paug' re (1991) zin mae" Rev. Dr. Stephen Rhekio yang checking kad' byid' ra". Myan mang: Bible Society bao" thaug' byid' ru qo" yu: ako". Ceru: kad' na zo" re" Bible Societies khyo" Jham: phaug' mau" zo" we' tin" ra" Work Shop dazin dalhang kad' ru mae Rev. Lalhaug' Gyung" Khao bomho" yu va". (1986) zin mae" Phaug'vo jham: N.T re Rev. Maji La Ja khyo" Revision kad' ra" mau" re Myan mang: Bible Society we' xo' yang: kad' na gau ngad: ra". Myan mang: Society wa myid kin dao mae" Bible Society (50) je qhan" to" ra" (UBS) United Bible Society we' xo' taui" ra" Bible Society ngad:. Jham: paug' myan" phaug' ru mae we' dam: nyhang" tung" ra" Revision kad' ru mae aqao: to: yang: ci: ra" Jham: paug' version wa TEV- Today's English Version ngad: ra". English myan" mae" yao: yao" myan" khyo myan" phaug' ra" mau" ngad mung: Jham: dao: lajheim: re phaug' ra" policy ngad: ra". Word to word mangad: lo: meaning to meaning lai khyo" phaug' ru ngad: ra".
